Kanadanyń Kvebek qalasynda ótken halyqaralyq Quebec International Pee-Wee Hockey Tournament 2026 dodasynda Astana Team komandasy AA Elites dıvızıonynyń altyn tuǵyrynan kórinip, el mereıin ústem etti, dep habarlaıdy Egemen.kz.
2013 jyly týǵan jas jetkinshekterden quralǵan otandastarymyz toptyq kezeńdegi barlyq kezdesýde jeńiske jetip, pleı-off satysyna nyq qadam basty. Shırek fınalda aıdyn ıeleri – Quebec Nordiques ujymyn 3:1 esebimen qapy qaldyrsa, jartylaı fınalda Quebec Remparts klýbynan 2:1 esebimen basym tústi. Al sheshýshi fınaldyq aıqasta Noir d'Or des Montagnes komandasymen kezdesip, tartysty ótken matchta býllıt serııasy boıynsha 4:3 esebimen jeńiske jetip, týrnırdiń bas júldesin ıelendi.
Aıta keterligi, Astana Team sapynda elordalyq «Astana», «Iýnost» klýbtarymen qatar, О́skemenniń «Torpedo», Almatynyń «Taıgers» jáne «Mıhaılov akademııasynyń» tárbıelenýshileri de óner kórsetti. Bul – bizdiń quramanyń atalǵan toptaǵy ekinshi júldesi: ótken jyly otandastarymyz dál osy sanatta kúmis medal enshilegen bolatyn.
Memleket basshysy Astana Team balalar hokkeı komandasyn jeńiske jetýimen quttyqtady
Eske sala keteıik, 1960 jyldan beri uıymdastyrylyp kele jatqan bul týrnır balalar hokkeıi álemindegi eń bedeldi báseke sanalady. AA Elites dıvızıonyndaǵy bul jeńis qazaqstandyq komandaǵa keler jyly eń joǵarǵy – AAA dıvızıonyna kóterilýge múmkindik beredi. Sońǵy sheshimdi týrnırdiń uıymdastyrý komıteti qabyldaıdy. Qazaqstandyq jasóspirimder bul deńgeıge 2024 jyly Fransııada ótken irikteý týrnırindegi jeńisteriniń arqasynda kóterilgen edi.